وزیراعظم کا آئندہ مالی سال میں معیشت مزید مضبوط بنانے کاعزم
اسلام آباد(پی ایم این)وزیراعظم شہباز شریف نے آئندہ مالی سال میں معیشت مزید مستحکم کرنے کے عزم کا اظہار کیا ہے۔
اسلام آباد میں وفاقی کابینہ کے اجلاس کی صدارت کرتے ہوئے انہوں نے بجٹ کو حتمی شکل دینے میں معاونت کرنے پر صدر آصف علی زرداری، بلاول بھٹو زرداری، تمام اتحادی جماعتوں اور وفاقی کابینہ کے ارکان سمیت سیاسی قیادت کا شکریہ ادا کیا۔
وزیراعظم نے مالی سال 2025-26 کے وفاقی بجٹ کی تیاری میں محنت اور لگن پر پوری اقتصادی ٹیم بالخصوص وزیر خزانہ محمد اورنگزیب اور چیئرمین ایف بی آر کی بھی تعریف کی۔
مشرق وسطیٰ کی صورتحال کا ذکر کرتے ہوئے شہباز شریف نے اسرائیل اور ایران کے درمیان جنگ بندی کا خیرمقدم کیا۔ انہوں نے تنازع کے پرامن حل پر اللہ تعالی کا شکر ادا کیا۔
وزیر اعظم نے جنگ بندی یقینی بنانے میں سعودی ولی عہد محمد بن سلمان سمیت مختلف ممالک کے اہم کردار کو بھی سراہا۔
ایران کی جانب سے قطر پر حملے کے حوالے سے وزیراعظم نے کہا کہ پاکستان نے اس حوالے سے بھی مذمتی بیان جاری کیا۔
محرم الحرام کے بارے میں وزیراعظم نے متعلقہ حکام کو ہدایت کی کہ ملک بھر میں جلوسوں اور مجالس کے دوران سکیورٹی کے فول پروف انتظامات اور سخت امن و امان یقینی بنایا جائے۔
وفاقی کابینہ نے جنوبی وزیرستان میں دہشت گردوں کے خلاف آپریشن میں جام شہادت نوش کرنے والے میجر معیز عباس شاہ شہید اور دیگر شہدا کے لیے فاتحہ خوانی بھی کی۔
وزیراعظم نے فتنہ الخوارج کے خلاف جنگ جیتنے کے عزم کا اعادہ کیا۔