بنوں: 132 کے وی بنوں گرڈ اسٹیشن میں مبینہ طور پر ایک رکن صوبائی اسمبلی کی مداخلت کے بعد بجلی کا نظام متاثر ہو گیا، جس کے نتیجے میں شہر کے متعدد علاقوں میں بجلی کی فراہمی معطل ہوگئی۔
پیسکو کے ترجمان کے مطابق رکن صوبائی اسمبلی ملک راحت نے گرڈ اسٹیشن پہنچ کر مبینہ طور پر تمام فیڈرز بحال کروا دیے، جس سے بجلی کا نظام اچانک اوورلوڈ ہو گیا اور گرڈ اسٹیشن سے بجلی کی ترسیل بند ہوگئی۔
ترجمان کا کہنا ہے کہ بجلی کی بندش کے باعث بنوں کے بیشتر علاقے تاریکی میں ڈوب گئے، جبکہ صارفین کو شدید مشکلات کا سامنا کرنا پڑا۔
پیسکو چیف کی ہدایت پر تکنیکی ٹیم نے فوری طور پر گرڈ اسٹیشن پر مرمتی اور بحالی کا کام شروع کر دیا ہے تاکہ بجلی کی سپلائی جلد از جلد معمول پر لائی جا سکے۔
ترجمان کے مطابق واقعے کی تحقیقات کا آغاز کر دیا گیا ہے اور مبینہ طور پر گرڈ اسٹیشن میں مداخلت کرنے پر رکن صوبائی اسمبلی ملک راحت کے خلاف قانونی کارروائی بھی شروع کر دی گئی ہے۔