قومی سلامتی کمیٹی کا اجلاس، اقوام متحدہ کے منشور کے مطابق ایران کے حق دفاع کا اعادہ
اسلام آباد(پی ایم این) قومی سلامتی کمیٹی نے ایک بار پھر کہا ہے کہ اقوام متحدہ کے منشور کے مطابق ایران کو اپنے دفا ع کا حق حاصل ہے ۔
قومی سلامتی کمیٹی کا اجلاس وزیراعظم شہبازشریف کی صدارت میں پیر کے روز اسلام آباد میں ہوا جس میں ایران کے خلاف اسرائیلی جارحیت کے بعد خطے کی بدلتی ہوئی صورتحال کاجائزہ لیاگیا ۔
کمیٹی نے اسرائیل کے جارحانہ اقدامات کی شدید مذمت کی اورافسوس ظاہر کیاکہ یہ فوجی حملے ایران اور امریکہ کے درمیان تعمیری مذاکراتی عمل کے دوران ہوئے۔
ان جارحانہ اور غیر محتاط اقدامات نے کشیدگی میں اضافہ کیا ہے اور مذاکرات اور سفارتکاری کے مواقع ختم کرکے ایک بڑے تصادم کا خطرہ پیدا کردیا ہے ۔
کمیٹی نے ایران کی حکومت اور عوام سے بے گناہ انسانی جانوں کے نقصان پر تعزیت اور زخمیوں کی جلد صحت یابی کی دعا کی ۔
پاکستان کے واضح موقف کا اعادہ کرتے ہوئے قومی سلامتی کمیٹی نے فردو، نطنز اوراصفہان میں ایرانی جوہری تنصیبات پرحملوں پر شدید تحفظات کااظہار کیا جو ایٹمی توانائی کے عالمی ادارے کی قراردادوں ، متعلقہ عالمی قوانین اور اقوام متحدہ کے منشور کی خلاف ورزی ہے ۔
کمیٹی نے متعلقہ فریقوں کے ساتھ قریبی رابطہ رکھنے کے پاکستان کے عزم اور خطے میں امن واستحکام کے فروغ کیلئے جاری کوششوں کو مزید تیز کرنے کا اعادہ کیا۔
قومی سلامتی کمیٹی نے تمام متعلقہ فریقوں پر زوردیا کہ وہ تنازعے کو اقوام متحدہ کے منشور کے مطابق بات چیت اور سفارت کاری سے حل کریں۔
کمیٹی نے بین الاقوامی انسانی حقوق اورانسانی قوانین پرکار بند رہنے کی ضرورت پر زوردیا۔