پاکستان کی دمشق گرجا گھر خودکش حملے کی شدید مذمت
اسلام آباد(پی ایم این)پاکستان نے شام کے دارالحکومت دمشق کے دوئلہ محلے میں مار الیاس چرچ پر ہونے والے خوفناک خودکش حملے کی شدید مذمت کی ہے۔
آج جاری ہونے والے ایک بیان میں دفتر خارجہ نے متاثرین کے اہل خانہ سے دلی تعزیت کا اظہار کیا اور زخمیوں کی جلد صحت یابی کے لیے دعا کی۔
خودکش حملے کے نتیجے میں قیمتی جانوں کا ضیاع ہوا اور بہت سے لوگ زخمی ہوئے۔
بیان میں کہا گیا کہ پاکستان دکھ کی اس گھڑی میں شام کے برادر عوام کے ساتھ مکمل یکجہتی کے ساتھ کھڑا ہے، اور ملک میں دیرپا امن و استحکام کے حصول کی کوششوں کے لیے اپنی بھرپور حمایت کا اعادہ کرتا ہے۔