زرعی شعبے میں اصلاحات سے معیشت کو فروغ ملے گا،وزیراعظم
اسلام آباد(پی ایم این)وزیراعظم محمد شہبازشریف نے کہا ہے کہ زرعی شعبے میں پائیدار اصلاحات سے ملکی معیشت کو مزید فروغ ملے گا۔
وہ زرعی شعبے کی ترقی کے حوالے سے آج اسلام آباد میں ایک جائزہ اجلاس کی صدارت کر رہے تھے۔
وزیراعظم نے کہا کہ زراعت ملکی معیشت میں ریڑھ کی ہڈی کی حیثیت رکھتی ہے اور اس شعبے میں اصلاحات سے فی ایکڑ پیداوار میں خاطر خواہ اضافہ ہوگا، جس سے پیداواری لاگت میں کمی آئے گی۔
وزیراعظم نے واضح کیا کہ زراعت کی ترقی کیلئے آئندہ بجٹ میں کھاد اور زرعی ادویات پر کوئی ٹیکس نہیں لگایا جا رہا۔
شہباز شریف نے کھیتی باڑی کیلئے مشینوں کے استعمال کی ترویج کیلئے زرعی مشینری اور آلات پر ٹیکس بتدریج کم کرنے کی ہدایت کی۔ انہوں نے زرعی اجناس ذخیرہ کرنے کی گنجائش بڑھانے کے حوالے سےاقدامات کو تیز کرنے کی بھی ہدایت کی۔
وزیر اعظم نے زرعی شعبے کی ترقی کیلئے نئے منصوبوں اور فنڈز کی فراہمی کو خوش آئند قرار دیا۔
اجلاس میں وزیراعظم کو زرعی شعبے میں اصلاحات کے حوالے سے تجاویزکے بارے میں بتایا گیا۔
اجلاس میں یہ بھی بتایا گیا کہ زرعی شعبے میں اصلاحات سے قیمتی زر مبادلہ کمایا جا سکے گا جس سے کسانوں کی آمدنی میں اضافہ ہوگا۔