اسلام آباد(پی ایم این/ویب ڈیسک)نائب وزیراعظم و وزیر خارجہ اسحاق ڈار سے چینی سفیر جیانگ ژی ڈونگ نے ملاقات کی جس دوران خطے کی صورتحال، اعلیٰ سطحی سفارتی رابطوں میں پیشرفت اور امن عمل کے فروغ سمیت باہمی تعاون کو مزید مضبوط بنانے پر اتفاق کیا گیا۔
ترجمان دفتر خارجہ کے مطابق اسحاق ڈار نے چینی سفیر کو سوئٹزرلینڈ میں ہونے والے اعلیٰ سطح کے مذاکرات سے متعلق پیشرفت سے آگاہ کیا جبکہ اپنے حالیہ دورہ مصر کی تفصیلات بھی شیئر کیں۔ملاقات میں پاکستان کی امن کوششوں کے لیے چین کی مسلسل حمایت کو سراہا گیا، اسحاق ڈار نے امن عمل سے متعلق چینی صدر کی چار نکاتی تجویز اور چین پاکستان پانچ نکاتی اقدام کی تعریف بھی کی۔
چینی سفیر جیانگ ژی ڈونگ نے خطے میں کشیدگی میں کمی اور استحکام کے لیے پاکستان کے کردار کو سراہتے ہوئے تعاون جاری رکھنے کے عزم کا اعادہ کیا۔دونوں جانب سے پائیدار سفارتکاری اور گفت و شنید کے ذریعے تمام تصفیہ طلب معاملات کے حل پر زور دیا گیا۔