اسلام آباد (پی ایم این/ویب ڈیسک)خواتین کے وراثتی حقوق کا تحفظ یقینی بنانے کیلئے وفاقی آئینی عدالت نے اہم فیصلہ جاری کر دیا، جس میں قرار دیا کہ وراثت میں خواتین کا حق ریاست کا نہیں بلکہ اللہ تعالیٰ کا بنایا قانون ہے ، قرآن پاک میں وراثت کے حق کو یقینی بنایا گیا ہے۔ وفاقی آئینی عدالت نے بلوچستان کی خاتون بی بی آمنہ کے مقدمہ میں بلوچستان ہائی کورٹ کا فیصلہ کالعدم قرار دے دیا ۔
فیصلے میں کہا گیا ہے بدقسمتی سے معاشرے میں خواتین کو وراثت سے محروم کرنے کا رجحان ہے ۔ اس کے لئے سماجی دباؤ کا ستعمال اور فراڈ بھی کیا جاتا ہے ۔ عدالتوں کی ذمہ داری ہے خواتین کی وراثت کے مقدمات کا باریک بینی سے جائزہ لیں ۔ کوئی بھی علاقائی روایت یا خاندانی نظام خواتین سے وراثت کا حق نہیں چھین سکتا ۔ خواتین کو وراثت میں حصہ نہ دینا اللہ تعالی کے احکامات اور ملکی قانون کی خلاف ورزی ہے ۔ وفاقی آئینی عدالت کا درخواست گزارخاتون کو شیئرز کے تعین کیلئے سول کورٹ میں پیش کرنے کا حکم ۔ کہا کہ سول کورٹ آئین اور قانون کے مطابق تمام جائیدادوں میں شیئرز کا فیصلہ کرے ۔ بی بی آمنہ نامی خاتون نے بھائیوں کے وراثتی جائیداد میں حصہ نہ دینے کو چیلنج کر رکھا تھا ۔