لاہور(پی ایم این/کرائم رپورٹر)لاہور پولیس نے بھٹو چوک سے پولیس وردی میں ملوث جعلی اہلکار کو گرفتار کرلیا۔ترجمان آپریشنز ونگ کے مطابق گرفتار ملزم کی شناخت فیصل پرویز عرف (حنان چیمپئن) کے نام سے ہوئی ہے، جو پولیس ملازم نہ ہونے کے باوجود وردی پہن کر خود کو اہلکار ظاہر کر رہا تھا۔ ابتدائی ریکارڈ چیکنگ سے واضح ہوا کہ ملزم محکمہ پولیس کا حصہ نہیں ہے۔
ترجمان نے بتایا کہ ملزم فیصل پرویز کو اس سے قبل پولیس یونیفارم میں ویڈیوز اپ لوڈ کرنے پر نوکری سے برطرف کیا جا چکا ہے، تاہم اس کے باوجود وہ دوبارہ وردی پہن کر سڑکوں پر گھومتا اور سوشل میڈیا پر سرگرم پایا گیاپولیس کے مطابق ملزم کے ٹک ٹاک اکاؤنٹ سے وردی میں بنائی گئی متعدد ویڈیوز بھی برآمد ہوئی ہیں، جن میں وہ خود کو پولیس اہلکار ظاہر کرتا رہا۔ ملزم کے خلاف تھانہ جنوبی چھاؤنی میں دھوکہ دہی کی دفعات کے تحت مقدمہ درج کر لیا گیا ہے۔