ا سلام آباد(پی ایم این/ویب ڈیسک)اقوامِ متحدہ کی جنرل اسمبلی میں دوسرے بین الاقوامی مائیگریشن ریویو فورم کے جنرل مباحثے کے دوران اقوامِ متحدہ میں پاکستان کے مستقل مندوب سفیر عاصم افتخار احمد نے کہا کہ ہجرت نے تاریخ کے مختلف ادوار میں معاشروں کی تشکیل میں ایک تبدیلی لانے والی قوت کے طور پر کردار ادا کیا ہے۔
انہوں نے کہا کہ گلوبل کمپیکٹ ہجرت کے شعبے میں بین الاقوامی تعاون کو فروغ دینے اور پائیدار ترقیاتی اہداف کے حصول میں مہاجرین کے کردار کو مضبوط بنانے کے لیے ایک غیرمعمولی فریم ورک ہے۔
سفیر عاصم افتخار احمد نے اسلاموفوبیا، زینوفوبیا اور مہاجرین کے خلاف بڑھتے ہوئے منفی اور نفرت انگیز بیانیوں پر تشویش کا اظہار کیا۔ انہوں نے سرحدی نظم و نسق کو مضبوط بنانے، انٹیلی جنس معلومات کے تبادلے میں بہتری، اور مجرمانہ نیٹ ورکس کے خلاف مربوط کارروائی کے ذریعے انسانی اسمگلنگ اور مہاجرین کی غیرقانونی نقل و حمل کے خلاف اجتماعی بین الاقوامی کوششوں کی اہمیت پر بھی زور دیا۔
انہوں نے انسانی نقل و حرکت سے متعلق اقوامِ متحدہ کے مکالمے کے دوران عالمی ہجرتی نظم و نسق میں پاکستان کے اہم کردار اور منفرد نقط نظر کو اُجاگر کیا۔
سفیر عاصم افتخار احمد نے کہا کہ پاکستانی تارکینِ وطن، جو تقریباً 88 لاکھ افراد پر مشتمل دنیا کی چھٹی بڑی ڈائسپورا ہیں، نہ صرف میزبان ممالک بلکہ پاکستان کے لیے بھی ایک قیمتی اثاثہ ہیں۔ انہوں نے مشرقِ وسطی، یورپ اور شمالی امریکہ میں معاشی ترقی کے فروغ میں پاکستانی پیشہ ور افراد اور کارکنوں کے اہم کردار کو بھی سراہا۔
انہوں نے مزید کہا کہ بیرونِ ملک مقیم پاکستانیوں کی جانب سے سالانہ 30 ارب ڈالر سے زائد ترسیلاتِ زر لاکھوں خاندانوں کی کفالت کا ذریعہ بن رہی ہیں اور مقامی ترقی، سماجی بہبود اور غربت کے خاتمے میں اہم کردار ادا کر رہی ہیں۔
سفیر عاصم افتخار احمد نے ترسیلاتِ زر کی منتقلی کی لاگت میں کمی، ڈیجیٹل مالیاتی خدمات کے فروغ، اور پائیدار ترقیاتی اہداف (SDGs) کے مطابق مالی شمولیت کو بہتر بنانے کے لیے بین الاقوامی تعاون بڑھانے کی ضرورت پر زور دیا۔