اسلام آباد(پی ایم این/ویب ڈیسک)وزیراعظم محمد شہباز شریف نے خطے اور دنیا بھر میں امن و استحکام کیلئے مذاکرات اور سفارتکاری کی اہمیت پر زور دیا ہے۔
وہ ایرانی وزیر خارجہ عباس عراقچی سے گفتگو کررہے تھے، جنہوں نے وزیراعظم ہاؤس اسلام آباد میں ان سے ملاقات کی۔
یہ ملاقات تقریباً دو گھنٹے تک جاری رہی۔
نائب وزیراعظم محمد اسحاق ڈار اور چیف آف آرمی سٹاف اور چیف آف ڈیفنس فورسز فیلڈ مارشل سید عاصم منیر، وزیر داخلہ محسن نقوی اور دیگر اعلیٰ حکام بھی اس موقع پر موجود تھے۔
وزیرِاعظم محمد شہباز شریف نے ایرانی وزیرِ خارجہ سید عباس عراقچی اور ان کے وفد سے اسلام آباد میں ملاقات پر اظہار مسرت کیا ہے۔
سوشل میڈیا ایکس پر ایک پیغام میں انہوں نے کہا کہ ملاقات میں موجودہ علاقائی صورتحال پر انتہائی خوشگوار تبادلہ خیال کیا گیا۔
وزیرِاعظم نے کہا کہ دونوں ممالک کے درمیان باہمی دلچسپی کے امور، بشمول پاکستان ایران دوطرفہ تعلقات کو مزید مضبوط بنانے پر بھی گفتگو ہوئی۔