اسلام آباد(پی ایم این/ویب ڈیسک)وزیراعظم محمد شہبازشریف نے تمام متعلقہ حکام کو آئندہ مون سون سیزن سے قبل مربوط تیاریوں کو تیز کرنے کی ہدایت کی ہے۔
اسلام آباد میں مون سون سیزن کی پیشگی تیاری اور موسمیاتی تغیرات کی وجہ سے ماحولیاتی خطرات سے نبرد آزما ہونے کے لیے اٹھائے گئے اقدامات پر جائزہ اجلاس کی صدارت کرتے ہوئے، انہوں نے گلیشئر پھٹنے سے جھیلوں میں آنے والے سیلاب سے بچاؤ کے لیے گلگت بلتستان میں نصب پیشگی انتباہ کا نظام مکمل طور پر فعال نہ ہونے کے معاملے کی اعلیٰ سطح کی انکوائری کا حکم دیا۔
انہوں نے کہا کہ پاکستان موسمیاتی تبدیلیوں سے سب سے زیادہ متاثر ہونے والے ممالک میں شامل ہے۔ انہوں نے ان تبدیلیوں کے خطرات میں کمی کیلئے ہنگامی بنیادوں پر کوششوں کی ضرورت پر زور دیا۔
وزیراعظم نے تمام متعلقہ اداروں کو مزید ہدایت کی کہ وہ ممکنہ سیلاب سے نمٹنے کے لیے اپنی استعداد کار میں اضافہ کریں اور عوام کی سہولت اور تحفظ کے لیے دستیاب وسائل سے بڑھ کر کام کریں۔