خلیجی ممالک میں پھنسے پاکستانیوں کی سہولت کیلئے جامع اقدامات کئے گئے ہیں، نائب وزیراعظم
خلیجی ممالک میں پھنسے پاکستانیوں کی سہولت کیلئے جامع اقدامات کئے گئے ہیں، نائب وزیراعظم
March 03, 2026
اسلام آباد(پی ایم این)نائب وزیراعظم اور وزیر خارجہ محمد اسحاق ڈارنے کہا ہے کہ حکومت نے ایران اور دیگر خلیجی ممالک میں پھنسے ہوئے پاکستانیوں کو سہولت اور تعاون فراہم کرنے کیلئے جامع اقدامات کیے ہیں۔
انہوں نے اسلام آباد میں صحافیوں کو مشرق وسطیٰ کی موجودہ صورتحال خصوصاً خلیجی ممالک میں پھنسے ہوئے پاکستانیوں کے مسئلے کے بارے میں بریفنگ دی۔
اسحاق ڈار نے بتایا کہ واپس آنے والے پاکستانی شہریوں کی مدد کیلئے خصوصی سہولت ڈیسک قائم کیے گئے ہیں۔
انہوں نے کہا کہ وزارت خارجہ کا کرائسس مینجمنٹ یونٹ چوبیس گھنٹے فعال ہے اور اس کے رابطہ نمبر سرکاری ایکس ہینڈل پر دستیاب ہیں۔
نائب وزیراعظم نے کہا کہ ابوظہبی میں پاکستان کا سفارتخانہ اورجدہ اور دبئی میں قونصل خانے پاکستانی شہریوں کی بھرپور معاونت کر رہے ہیں۔
اسحاق ڈار نے کہا کہ پاکستانیوں کورہنمائی اور تعاون فراہم کرنے کیلئے ایران کے شہروں تہران، زاہدان اور مشہد میں تین سہولت مراکز قائم کیے گئے ہیں۔
انہوں نے کہا کہ پاکستان مختلف ممالک کے وزرائے خارجہ اور اعلیٰ حکام سے رابطے میں ہے تاکہ پھنسے ہوئے پاکستانیوں کو ہر ممکن سہولت فراہم کی جا سکے۔
انہوں نے بحرین، عمان، کویت، سعودی عرب، قطر، ایران اور آذربائیجان کا پاکستانی شہریوں کی معاونت اور تعاون کے لیے شکریہ بھی ادا کیا۔