اسلام آباد مذاکرات سے افہام و تفہیم سےمعاملات حل کرنے میں مدد ملے گی: رضوان شیخ
اسلام آباد(پی ایم این)امریکہ میں پاکستان کے سفیر رضوان سعید شیخ نے کہا ہے کہ ایران اور امریکا کے درمیان اسلام آباد مذاکرات سے بات چیت اور افہام و تفہیم سے معاملات کو حل کرنے میں مدد ملے گی۔
امریکی نشریاتی ادارے این بی سی کے معروف پروگرام میٹ دا پریس سے گفتگو میں انہوں نے کہا کہ جنگ بندی اور مذاکراتی عمل کے حوالے سے اعلیٰ سطح پر سفارتی کوششیں جاری تھیں۔
پاکستان کے سفیر نے کہا کہ پاکستان نے اپنی دیرینہ مثبت روایت کو برقرار رکھتے ہوئے سفارتی کوششیں سرانجام دیں اور سفارت کاری کے اس عمل میں پاکستان کو سعودی عرب، مصر، ترکیہ اور دیگر شراکت داروں کی حمایت و معاونت حاصل رہی ۔
انہوں نے کہا کہ اسلام آباد میں شروع ہونے والے مذاکراتی عمل میں فریقین کا تعمیری جذبہ کارفرما رہا ہے۔ اور اس بات چیت اور افہام و تفہیم سے معاملات کو حل کرنے میں مدد ملے گی۔
انہوں نے کہا کہ پاکستان بنیادی طور پر ایک سہولت کار کا کردار ادا کر رہا ہے۔ تصفیہ طلب معاملات کے حل کی ذمہ داری بہر طور متعلقہ فریقین کی ہے۔ انہوں نے کہا کہ معاملے کے حل کے حوالے سے پاکستان اور عالمی برادری نیک خواہشات کا اظہار کر رہی ہے۔
انہوں نے کہا کہ اس وقت سفارت کاری کو بھرپور موقع فراہم کرنے کی ضرورت ہے۔