اسلام آباد(پی ایم این)رہنما ایم کیو ایم فاروق ستار نے کہا ہے کہ مقامی حکومتوں کو با اختیار بنانا 25 کروڑ عوام کا مسئلہ ہے۔ حکومت سے مذاکرات میں اہم کامیابی یہ ملی ہے کہ بلدیاتی نظام کو با اختیار بنانے کیلیے آئینی ترمیم پر پیش رفت ہوئی ہے اور حکومت نے آرٹیکل 140 اے سے متعلق آئینی ترمیم پر یقین دہانی کرائی ہے۔انہوں نے بتایا کہ آئینی ترمیم کیلیے 8 رکنی مشترکہ کمیٹی قائم کرنے پر اتفاق ہو گیا ہے۔ مسلم لیگ ن اور ایم کیو ایم کی مشترکہ کمیٹی سیاسی جماعتوں سے رابطے کرے گی اور آئینی ترمیم کیلیے دو تہائی اکثریت حاصل کرنے کی کوشش کی جائے گی۔
وزیراعظم شہبازشریف سے ملاقات کے بعد میڈیا سے گفتگو کرتے ہوئے فاروق ستار نے کہا کہ ایم کیو ایم پاکستان وفاق میں اتحادی جماعت، اور حکومت کا بوجھ اٹھا رہی ہے۔ وزیراعظم سے ملاقات میں کچھ مطالبات سامنے رکھے ہیں اور ان کی جانب سے ہمارے تحفظات یا مطالبات کو توجہ سے سنا گیا ہے۔فاروق ستار نے گورنر سندھ سے متعلق گفتگو کرتے ہوئے کہا کہ سندھ مین گورنر شپ ایم کیو ایم کا حق ہے اور ہم نے وزیراعظم کے سامنے اپنا یہ مطالبہ پھر دہرایا ہے۔ وزیراعظم نے اس معاملے پر مزید بات چیت کی یقین دہانی کرائی ہے۔ایم کیو ایم رہنما نے یہ بھی بتایا کہ لاپتہ کارکنان کی تلاش کا مطالبہ وزیراعظم کے سامنے رکھا ہے، اور انہوں نے لاپتہ کارکنان کے مسئلے پر تعاون کی یقین دہانی کرائی ہے۔فاروق ستار نے یہ بھی کہہ کہ لاپتہ افراد کی تلاش کے لیے وزارت داخلہ کے ساتھ پیش رفت پر اتفاق ہوا ہے اور وزیر اعظم نے نائب وزیراعظم اسحاق ڈار اور رانا ثنا اللہ کو معاملہ آگے بڑھانے کی ہدایت کر دی ہے۔