اسلام آباد(پی ایم این/ویب ڈیسک )وفاقی بجٹ سے متعلق پیپلز پارٹی اور حکومت کی تکنیکی کمیٹی نائب صدر اسحاق ڈار کی زیر صدارت کام کرے گی۔
اس حوالے سے ذرائع کا کہنا ہے کہ پیپلز پارٹی اور حکومت کی تکنیکی کمیٹی اپنی سفارشات وزیراعظم شہباز شریف اور بلاول بھٹو کو پیش کرے گی۔
ذرائع کے مطابق وزیر خزانہ محمد اورنگزیب بھی مشاورت کے لیے تکنیکی کمیٹی میں شرکت کریں گے۔ اس کے علاوہ تکنیکی کمیٹی پیپلز پارٹی کے ساتھ دیگر بجٹ کے تمام تصفیہ طلب امور پر بھی بات چیت کرے گی، تکنیکی کمیٹی میں احسن اقبال، رانا ثنا اللہ، اعظم نذیرتارڑ ،بلال اظہر کیانی بھی معاونت کرینگے۔
ذرائع کا کہنا ہے کہ پیپلز پارٹی سے مراد علی شاہ، شیری رحمان، نوید قمر، سلیم مانڈوی والا اور جام خان شورو مشاورت کا حصہ ہوں گے۔
نائب وزیراعظم اسحاق ڈار مالیاتی امور کیلئے وزارت خزانہ کے متعلقہ حکام کو طلب کرسکیں گے، وزارت خزانہ کے مختلف شعبہ جات کے ڈی جیز کو بھی معاونت کیلئے طلب کیا جاسکے گا۔