حلقہ ارباب ذوق لاہور،امجدطفیل کی زیرصدارت رواں سیشن کا چھٹا اجلاس

لاہور(پی ایم این/نیوزرپورٹر)حلقہ ارباب ذوق لاہور کے رواں سیشن کا چھٹا اجلاس امجد طفیل کی صدارت میں ہوا، ان کے بروقت نہ پہنچنے پر انجم شیرازی کی صدارت میں جوائنٹ سیکرٹری شہزاد فراموش نے گزشتہ اجلاس کی کارروائی پڑھی۔جس کی توثیق کے بعد شفقت رسول مرزا نے اپنی غزل تنقید کیلئے پیش کی تو امجد طفیل صدارتی نشست سنبھال چکے تھے۔ اس کے بعدحنا بابر نے نظم ”سراب“ تنقید کیلئے پیش کی۔نظم اور غزل پر گفتگو کرتے ہوئے صاحب صدارت نے کہا کہ مجلسی تنقید میں تخلیق کار کو جو اچھا لگتا ہے لے لیتا ہے۔بعد ازاں نیلم احمد بشیر نے اپنے دو مختصر افسانے تنقید کیلئے پیش کئے جن میں پہلے افسانے کا عنوان ”لمس“ اور دوسرے کا”ضرورت“ تھا جن پر گفتگو کے بعد صاحب صدارت نے کہا کہ "لمس” زیادہ لوگوں نے پسند کیا ۔مجھے اس میں جو پوائنٹ غور کرنے والا لگاوہ یہ کہ پہلے لمس کو زندگی کے آخری لمس سے جوڑا گیا ہے ۔انہوں نے خوشگوار موڈ میں کہا کہ افسانہ "ضرورت مند” پر تو نواز کھرل نے صدارتی خطبہ ارشاد فرما دیا ہے۔اس کے بعد آفتاب جاوید نے اعلان کیا کہ آئندہ خصوصی اجلاس مذاکرہ پر مبنی ہے۔اس کا عنوان "فلسطین اور ایران کی صورتحال” ہے۔ حسن جعفر زیدی کی صدارت میں تین بڑی شخصیات ظہیر کاشمیری، عزیز الحق اور ایرک سپرین کو خراج عقیدت بھی پیش کیا جائیگا۔