عورت چھوٹے مرد سے شادی کرے تو باتیں بنتی ہیں، اقبال حسین

لاہور(پی ایم این/ویب ڈیسک)اداکار و ہدایت کاراقبال حسین نے کہاہے کہ 50 سے 60 سال کا مرد اگر 18 سال کی لڑکی سے شادی کرلے تو لوگ کچھ نہیں کہتے لیکن وہیں اگر عورت چند سال چھوٹے مرد سے شادی کرلے تو لوگ برا بھلا کہنے لگتے ہیں۔
انہوں نےحال ہی میں ایک شو میں اپنی اہلیہ اداکارہ بشریٰ انصاری کے ساتھ شرکت کی جس میں انہوں نے گفتگو کرتے ہوئے کہاکہ میری اور بشریٰ کی عمر میں تھوڑا سا فرق ہے جو مجھے محسوس کبھی نہیں ہوا لیکن لوگوں نے اتنی باتیں کیں کہ بشریٰ جیسی خاتون بھی گھبرا گئیں، یہ سوسائٹی کا المیہ ہے، دن رات لوگوں کو جج کرتی ہے۔
انہوں نے کہاکہ میرے نزدیک معاشرے کے اندر کرپشن یہ ہے کہ ہم ایک دوسرے کو جج کرتے ہیں، قیامت والے دن کا معاملہ ہم نے اپنے ہاتھ میں لے لیا ہے، اللہ کافی ہے ہمیں جج کرنے کے لیے، اگر میں آپ کی اچھائی نہیں دیکھ سکتا تو برائی دیکھ کر اسے دیوار پر ضرور لکھوں گا۔