کراچی(پی ایم این/ویب ڈیسک)انمول پنکی منشیات کیس میں پیش رفت،سندھ حکومت کی جانب سے ایس پی انویسٹی گیشن فتح محمد کو عہدے سے ہٹا دیا گیا ہے جس کا نوٹیفکیشن بھی جاری کردیا گیا ہے۔پولیس افسر شاہجہان کو ایس پی انویسٹی گیشن سٹی تعینات کیا گیا ہے جبکہ فتح محمد کا بطور سپرنٹنڈنٹ کمانڈو ٹریننگ سینٹر سکرنڈ فوری تبادلہ کیا گیا ہے۔
نجی ٹی وی اے آر وائی نیوز نے پولیس تفتیشی ٹیم کی جانب سے چالان عدالت میں جمع نہ کروانے کی خبر دی تھی جبکہ عدالت نے بھی پنکی کیس میں چالان پیش نہ کرنے پر برہمی کا اظہار کیا تھا۔
ایس پی انویسٹی گیشن سٹی عدالت میں دو مقدموں کا چالان پیش نہ کرسکے تھے۔واضح رہے کہ تفتیشی افسر نے چالان پیش کرنے کے لیے مہلت مانگی تھی جبکہ عدالت نے آئندہ سماعت پر چالان طلب کیا تھا۔پراسیکویشن نے کہا تھا کہ بغیر کسی جواز کے ایف آئی آر کے اندراج میں تقریباً تیس دن کی تاخیر کی گئی، چالان جمع کرانے میں بھی بارہ دن کی تاخیر کی گئی۔