لاہور(پی ایم این/ویب ڈیسک)کالعدم جوائنٹ ایکشن کمیٹی کے مرکزی رہنماؤں کی مبینہ آڈیو سامنے آئی ہے جس میں کالعدم جوائنٹ ایکشن کمیٹی کے مرکزی رہنما شوکت نواز میر اور خواجہ مہران کو آزاد کشمیر میں احتجاج کے حوالے سے بات کرتے ہوئے سنا جاسکتا ہے۔
وزیر مملکت برائے قانون بیرسٹر عقیل ملک نے ایکس پر آڈیو ری پوسٹ کرتے ہوئےکہا کہ کالعدم جوائنٹ ایکشن کمیٹی کے رہنما کی مبینہ آڈیو لیک نے کئی حقائق سے پردہ اٹھا دیا ہے۔ اگر اس کی تصدیق ہو جاتی ہے تو یہ نہ صرف تنظیم کے خلاف کارروائیوں کا مضبوط جواز بنے گی بلکہ اس کے اصل عزائم اور مبینہ سرگرمیوں کو بھی بے نقاب کر دےگی۔وزیر مملکت برائے داخلہ سینیٹر طلال چوہدری نے لکھا کہ کالعدم ایکشن کمیٹی کے حوالے سے متعدد شواہد پہلے سے بھی موجود ہیں، تاہم یہ مبینہ فون کال کا معاملہ انتہائی سنگین نوعیت کا ہے۔ اس کی مکمل، جامع اور غیر جانبدارانہ تحقیقات کی ضرورت ہے، جو متعلقہ اداروں کی جانب سے ہنگامی بنیادوں پر فوری طور پر عمل میں لائی جائیں گی۔