لاہور(پی ایم این/حامدمغل)لاہورکے مختلف علاقوں میں فائرنگ کے واقعات میں ایک شہری جاں بحق اور4افرادزخمی ہوگئے پولیس نے 3ملزمان کو گرفتار کرلیا،پولیس کے مطابق شفیق آباد کے علاقے میں فائرنگ کے ایک واقعے میں ایک شہری جاں بحق ہو گیا، جبکہ پولیس نے مقدمہ درج کرکے تین نامزد ملزمان کو گرفتار کر لیا،پولیس کے مطابق وقاص نامی شہری اپنی بیٹیوں کو گھر کے باہر جھولا جھلوا رہا تھا کہ اسی دوران ملزم فرید عرف ماجھا مالی نے مبینہ طور پر اندھا دھند فائرنگ کر دی۔ فائرنگ کے نتیجے میں وقاص شدید زخمی ہو گیاجو زخموں کی تاب نہ لاتے ہوئے دم توڑ گیا۔
ہربنس پورہ کے علاقے میں ایک شادی ہال میں جھگڑے کے دوران فائرنگ کے نتیجے میں 3 افراد زخمی ہو گئے۔ واقعے کے بعد علاقے میں خوف و ہراس پھیل گیا جبکہ زخمیوں کو فوری طور پر ہسپتال منتقل کر دیا گیا۔پولیس کے مطابق تحقیقات مکمل ہونے کے بعد ذمہ دار افراد کے خلاف قانون کے مطابق کارروائی عمل میں لائی جائے گی۔
جوہر ٹاؤن کے علاقے میں فائرنگ کے ایک واقعے میں 18 سالہ نوجوان زخمی ہو گیا، جسے فوری طور پر طبی امداد کے لیے جناح ہسپتال منتقل کر دیا گیا،پولیس کے مطابق زخمی نوجوان کی شناخت طارق کے نام سے ہوئی ہے جو وفاقی کالونی کا رہائشی ہے۔ اہلخانہ کا کہنا ہے کہ واقعے کے وقت طارق اپنے گھر میں موجود تھا کہ نامعلوم موٹرسائیکل سواروں نے فائرنگ کر دی، جس کے نتیجے میں وہ گولی لگنے سے زخمی ہو گیا۔
فائل فوٹو 