پنجاب حکومت کا لاہور میں شہریوں کو کرائے پر الیکٹرک بائیک فراہم کرنے کا فیصلہ

لاہور(پی ایم این)پنجاب حکومت نے لاہور میں شہریوں کو کرائے پر الیکٹرک بائیک فراہم کرنے کا فیصلہ کیا ہے، جس کا مقصد ماحول دوست ٹرانسپورٹ کو فروغ دینا ہے۔منصوبے کے ابتدائی مرحلے میں پنجاب حکومت 10,000 الیکٹرک بائیک کرایہ پر دے گی جبکہ شہر بھر میں 300 ڈاکنگ اور چارجنگ اسٹیشن قائم کیے جائیں گے۔پنجاب ہاؤسنگ اتھارٹی (PHA) ان اسٹیشنوں کے لیے زمین فراہم کرے گی، جس سے رہائشی اور تجارتی علاقوں اور قریبی پبلک ٹرانسپورٹ پوائنٹس کے درمیان بہتر رابطہ ممکن ہو سکے گا۔متعلقہ حکام کا کہنا ہے کہ اس منصوبے سے لاہور میں کاربن کے اخراج میں نمایاں کمی کی توقع ہے، جس سے سالانہ ہزاروں ٹن کاربن کی پیداوار میں کمی آئے گی اور شہر میں فضائی آلودگی اور اسموگ کی سطح کو کنٹرول کرنے میں مدد ملے گی۔اس سروس کو طلبہ، ملازمین اور عام لوگوں کے لیے سستی اور جدید نقل و حرکت کا حل پیش کرنے کے لیے ڈیزائن کیا گیا ہے، جو موبائل ایپلیکیشن کے ذریعے ای بائک تک رسائی حاصل کر سکیں گے۔تاہم حکومت نے ابھی تک مجوزہ ای- بائیک سروس کے لیے کرایے کے چارجز کے حوالے سے کسی تفصیلات کا اعلان نہیں کیا ہے، اور یہ ابھی تک واضح نہیں ہے کہ آیا یہ بائیک فی گھنٹہ یا یومیہ ادائیگی کی بنیاد پر دستیاب ہوں گی۔