اسلام آباد( پی ایم این)صدرآصف زرداری اور وزیراعظم شہبازشریف کی ملاقات،پیپلزپارٹی کابجٹ منظورکروانے کیلئے گرین سگنل دیدیاذرائع کے مطابق وزیراعظم شہباز شریف اور صدر آصف زرداری کے درمیان ملاقات ایوان صدر میں ہوئی جس میں بجٹ سے متعلقہ امور زیر غور آئے۔حکومت اور پیپلزپارٹی نے ایک دوسرے کی بیشتر بجٹ تجاویز سے اتفاق کیا ہے۔ذرائع کا کہنا ہے کہ وسائل اور مسائل دیکھتے ہوئے دونوں ایک دوسرے کے لیے اسپیس دیں گے، بعض قابل عمل نکات پر تکنیکی کمیٹیاں مشاورت جاری رکھیں گی۔
علاوہ ازیں وزیراعظم نے جی بی الیکشن میں کامیابی پر آصف زرداری کو مبارکباد دی۔شہباز شریف نے مسکراتے ہوئے کہا کہ بلاول نے ہم سے بہتر انتخابی مہم چلائی، جواب میں صدر زرداری نے بھی کہا کہ آخر بیٹا کس کا ہے۔واضح رہے کہ چند روز قبل پیپلزپارٹی نے بجٹ تجاویز کی فراہمی کے لیے حکومت سے وقت مانگا تھا جبکہ حکومت نے بجٹ سازی میں پیپلزپارٹی کو ساتھ رکھنے کی یقین دہانی کروائی تھی۔
ذرائع کا کہنا تھا کہ پیپلزپارٹی کی معاشی ٹیم نے بجٹ تجاویز پر کام شروع کردیا ہے، یاد رہے کہ پیپلزپارٹی نے حکومت کو بجٹ پر تحفظات سے آگاہ کیا تھا۔حکومت نے پیپلزپارٹی کے تحفظات دور کرنے کی یقین دہانی کروائی تھی۔