لاہور(پی ایم این/حامدمغل)غیرملکی خاتون کے مبینہ اغوا کے بعد برآمدگی کےکیس کی ابتدائی تحقیقات میں پولیس ذرائع کے مطابق اغواکا الزام ثابت نہیں ہوا،
پولیس ذرائع کے مطابق غیرملکی خاتون صوفیہ اپنی مرضی سے نعمان کے ساتھ گئی،ابتدائی تحقیقات کے میں انکشاف ہواکہ صوفیہ رواں سال مارچ میں بھی پاکستان آئی تھی، جہاں اس کی ایک نوجوان احمد سے دوستی ہوئی اور وہ اس کے ہمراہ ہنزہ بھی گئی تھی۔ جہاں صوفیہ کی نعمان نامی شہری سے بھی ملاقات ہوئی اور دونوں کے درمیان دوستی قائم ہوئی۔
سرور روڈ تھانے میں درج مقدمے کی مزید تحقیقات جاری ہیں اور تمام پہلوؤں کا باریک بینی سے جائزہ لیا جا رہا ہے۔پولیس ذرائع کے مطابق مقدمے میں خود کو صوفیہ کا شوہر ظاہر کرنے والا شخص اس کا قانونی شوہر نہیں ہے، بلکہ وہ نیپالی شہری ہے، جبکہ صوفیہ سوئٹزرلینڈ سے پاکستان آئی تھی۔
صوفیہ نے پاکستان آمد سے قبل ہی نعمان کے ساتھ ہنزہ جانے کا منصوبہ بنایا تھا اور وہ لاہور ایئرپورٹ سے خود نعمان کے ہمراہ روانہ ہوئی۔