لاہور(پی ایم این/خالد محمود)پنجاب میں تعلیمی شیڈول میں ممکنہ بڑی تبدیلیوں کا عندیہ سامنے آیا ہے، جہاں حکومت گرمیوں کی طویل چھٹیوں پر نظرِثانی کرنے پر غور کر رہی ہے.
صوبائی وزیر تعلیم رانا سکندرحیات نے نجی تعلیمی اداروں کے مؤقف سے اتفاق کرتے ہوئے کہا ہے کہ طویل گرمیوں کی چھٹیوں کے باعث طلبہ کی پڑھائی متاثر ہو رہی ہے، اسی لیے تعلیمی کیلنڈر میں تبدیلی زیر غور ہے۔
انہوں نے بتایا کہ ایک تجویز کے تحت گرمیوں کی تعطیلات کے بعد متبادل ہفتوں میں اسکول کھولنے کا منصوبہ زیر غور ہے، جبکہ نجی اسکولز کے ساتھ مشاورت کے ذریعے نیا اکیڈمک کیلنڈر ترتیب دیا جائے گا۔
وزیر تعلیم کا کہنا تھا کہ اچانک تعطیلات کی صورت میں بھی متبادل تدریسی منصوبہ تیار کیا جائے گا، جبکہ جمعہ کی ہفتہ وار چھٹی کے اثرات کو بھی مدنظر رکھا جا رہا ہے۔
ان کے مطابق سال میں کم از کم 180 تدریسی دن ہونے چاہئیں، لیکن اس وقت تعلیمی ادارے صرف 140 دن کھل رہے ہیں۔ اس کمی کو پورا کرنے کے لیے حکومت 30 سے 45 دن کے سمر کیمپس کی اجازت دینے پر بھی غور کر رہی ہے تاکہ طلبہ کی تعلیمی سرگرمیاں جاری رہیں۔
انہوں نے مزید کہا کہ تعطیلات سے متعلق فیصلہ پورے صوبے کے حالات کو سامنے رکھ کر کیا جائے گا، خاص طور پر جنوبی پنجاب میں شدید گرمی کے باعث سرکاری سکولز کو درپیش مسائل کو بھی مدنظر رکھا جائے گا، کیونکہ نجی اسکولوں میں ایئر کنڈیشننگ کی سہولت موجود ہوتی ہے جبکہ سرکاری اداروں کی صورتحال مختلف ہے۔