ا سلام آباد(پی ایم این/ویب ڈیسک)اقوام متحدہ میں پاکستان کے مستقل مندوب، سفیر عاصم افتخار احمد نے اقوام متحدہ اور کثیرجہتی نظام کے ساتھ پاکستان کے گہرے اور مستقل عزم کا اعادہ کیا ہے۔
وہ امریکی آرمی وار کالج کے 40 رکنی وفد کو اقوام متحدہ میں پاکستانی مشن کے دورے کے موقع پر بریفنگ دے رہے تھے۔
سفیر نے اقوام متحدہ کو بین الاقوامی امن و سلامتی، ترقی، انسانی حقوق، موسمیاتی تبدیلی اور مصنوعی ذہانت و انفارمیشن ٹیکنالوجی جیسے ابھرتے ہوئے چیلنجز سے نمٹنے کیلئے اجتماعی اقدامات کا مرکزی پلیٹ فارم قرار دیا۔
عاصم افتخار احمد نے پاکستان اور امریکہ کے درمیان وسیع البنیاد اور متحرک تعلقات پر بھی روشنی ڈالی، جن میں سلامتی، دفاع، انٹیلی جنس، انسداد دہشتگردی، اقتصادی تعاون، تجارت اور عوامی روابط شامل ہیں۔ انہوں نے امریکہ اور ایران کے درمیان کشیدگی کے تناظر میں پاکستان کے تعمیری اور مصالحانہ کردار کو بھی اجاگر کیا۔