ا سلام آباد(پی ایم این/ویب ڈیسک) وزیراعظم محمد شہباز شریف نے کہا ہے کہ وہ آبنائے ہرمز میں پراجیکٹ فریڈم کو روکنے کے بروقت اعلان پر صدر ڈونلڈ ٹرمپ کے شکر گزار ہیں۔
انہوں نے ایکس پر اپنی ایک پوسٹ میں کہا کہ پاکستان اور دیگر برادر ملکوں بالخصوص سعودی عرب اور اس کے ولی عہد شہزادہ محمد بن سلمان کی جانب سے کی گئی درخواست پر صدر ٹرمپ کا شائستہ ردعمل اس نازک وقت میں علاقائی امن، استحکام اور مفاہمت کو آگے بڑھانے کی جانب ایک سنگ میل ثابت ہوگا۔
شہباز شریف نے کہا کہ پاکستان ان تمام کوششوں کی حمایت کیلئے پرعزم ہے جو صبرو تحمل، مذاکرات اور سفارت کاری کے ذریعے تنازعات کے پرامن حل کو فروغ دیتی ہیں۔
وزیراعظم نے کہا کہ ہمیں پوری امید ہے کہ موجودہ پیشرفت ایک پائیدار معاہدے کاباعث بنے گی جس سے خطے اور اس سے باہر پائیدار امن اور استحکام کو یقینی بنایا جاسکے گا۔