اسلام آباد(پی ایم این/ویب ڈیسک)وزیراعظم شہباز شریف نے ایران کے ساتھ جنگ بندی میں توسیع کی پاکستان کی درخواست قبول کرنے پر امریکی صدر ڈونلڈ ٹرمپ کا شکریہ ادا کیا ہے۔
انہوں نے سوشل میڈیا پلیٹ فارم ایکس پر ایک پوسٹ میں اپنی اور فیلڈ مارشل سید عاصم منیر کی جانب سے صدر ٹرمپ کا تہہ دل سے شکریہ ادا کیا کہ انہوں نے جنگ بندی میں توسیع کی درخواست کو خوش دلی سے قبول کیا تاکہ جاری سفارتی کوششوں کو منطقی انجام تک پہنچایا جا سکے۔
شہباز شریف نے کہا کہ پاکستان پر کئے گئے اعتماد کے ساتھ تنازعات کے مذاکراتی حل کے لیے بھرپور کوششیں جاری رکھی جائیںگی۔
انہوں نے امید ظاہر کی کہ فریقین جنگ بندی کی پاسداری جاری رکھیں گے اور تنازع کے مستقل خاتمے کے لیے اسلام آباد مذاکرات کے دوسرے دور کے دوران ایک جامع ‘امن معاہدہ’ طے کرنے میں کامیاب ہو جائیں گے۔