اسلام آباد(پی ایم این)وزیراعظم شہبازشریف نے سرکاری ونجی شراکت داری کے ذریعے ترقیاتی منصوبوں پر کام کی رفتارتیز کرنے کیلئے پبلک پرائیویٹ پارٹنرشپ اتھارٹی اور اس سے منسلک نظام کو مزید ہم آہنگ اور مربوط کرنے کی اصولی منظوری دی ہے۔
انہوں نے یہ منظوری اسلام آباد میں پبلک پرائیویٹ پارٹنرشپ کے حوالے سے اجلاس کی صدارت کرتے ہوئے دی۔
اجلاس میں فیصلہ کیا گیا کہ پبلک پرائیویٹ پارٹنرشپ اتھارٹی اپنی کارکردگی کو جدید تقاضوں سے ہم آہنگ کرنے اور سرکاری ونجی شراکت داری کے تحت منصوبوں پر کام تیزکرنے کے لیے نجکاری ڈویژن کے تحت کام کرے گی۔
وزیراعظم نے ہدایت کی کہ پبلک پرائیویٹ پارٹنرشپ کے ذریعے ترقیاتی منصوبوں کو موثر انداز میں شروع کرنے کے لیے متعلقہ وزارتوں اور محکموں کی استعداد کار بڑھائی جائے۔
انہوں نے ہدایت کی کہ سرکاری ونجی شراکت داری کے ذریعے شروع کیے گئے ترقیاتی منصوبوں کو وزارتوں اور محکموں کی کارکردگی کا جائزہ لینے کے لیے کلیدی کارکردگی اشاریوں کا حصہ بنایا جائے۔
وزیراعظم نے کہا کہ پبلک پرائیویٹ پارٹنرشپ اتھارٹی کے ذریعے سرکاری ونجی شراکت داری کو مزید شفاف اور موثر بنانے کی کوششیں کی جارہی ہیں۔
اجلاس کو علاقائی اور عالمی سطح پر مختلف ممالک میں نافذ کیے جانے والے پبلک پرائیویٹ پارٹنرشپ ماڈلز کے تقابلی تجزیے کے بارے میں بتایا گیا۔