اسلام آباد(پی ایم این/ویب ڈیسک)امریکہ میں پاکستان کے سفیر رضوان سعید شیخ نے کہا ہے کہ پاکستان کا جغرافیہ ہی نہیں ، حال اور مستقبل بھی مشرق وسطیٰ سے وابستہ ہے ۔
امریکہ کی معروف تعلیمی درسگاہ جارج ٹاؤن یونیورسٹی میں چوتھی سالانہ پاکستان ۔ امریکہ کانفرنس سے اپنے کلیدی خطاب میں رضوان سعید شیخ نے کہا کہ جغرافیائی اعتبار سے پاکستان کا محل وقوع انتہائی اہمیت کا حامل ہے ۔ گزشتہ 8 دہائیوں سے پاکستان علاقائی و عالمی سطح پر بالواسطہ اوربلاواسطہ طور پر اہم کردار ادا کرتا رہا ہے ۔
انہوں نے کہا کہ مشرقی و مغربی سرحدوں سے جنم لینے والے خطرات ، نامساعد حالات اور دیگر چیلنجز کے باوجود پاکستان نے ہمیشہ علاقائی و عالمی امن و سلامتی کے ضمن میں مثبت اور کامیاب کردار ادا کیا ہے ۔
پاکستانی سفیر نے کہا کہ امریکہ ۔ ایران تنازع میں پاکستان کی مثبت کاوشوں اور سہولت کاری کو پاکستان کی کامیاب سفارتی تاریخ کی روشنی میں دیکھا جانا چاہئے ۔ موجودہ تنازع میں متعلقہ فریقین کے ساتھ ساتھ خطے کے دیگر ممالک کی جانب سے پاکستان پر اعتماد کا اظہار قابل فخر ہے۔
رضوان سعید شیخ نے کہا کہ پاکستان اپنا کردار انتہائی نیک نیتی، عاجزی ، احساس ذمہ داری اور خلوص سے ادا کر رہا ہے۔
انہوں نے کہا کہ خارجہ پالیسی کے حوالے سے پاکستان کی توجہ جیو پالیٹکس سے بڑھ کر جیو اکنامکس پر مرکوز ہے ، پاکستان چین، وسطی ایشیا اور خلیج ریاستوں کے مابین اہم معاشی راہداری فراہم کر سکتا ہے ۔ انہوں نے کہا کہ آبنائے ہرمز کی بندش سے راہداری اور ترسیلات کے حوالے سے پاکستان کی جغرافیائی اہمیت مزید واضح ہوئی۔ ہمارا شمار کرہ ارض کی قدیم ترین تہذیبوں میں ہوتا ہے اور ہم علاقائی و عالمی امن اور معاشی معاملات میں اپنا کردار ادا کرتے رہیں گے۔
رضوان سعید شیخ نے کہا کہ بانی پاکستان قائداعظم محمدعلی جناح نے پاکستان کو دنیا کا مرکز بننے کی پیش گوئی کی تھی جوآج آٹھ دہائیوں کے بعد بھی مستند اور مسلمہ ہے ۔ قائد اعظم کا یہی وژن آج بھی ہمارا مطمع نظر اور منزل ہے۔