اسلام آباد(پی ایم این)وزیرِاعظم شہباز شریف نے اس عزم کا اعادہ کیا ہے کہ پاکستان خطے میں امن و استحکام کے فروغ کے لیے اپنی مخلصانہ اور سنجیدہ کوششیں جاری رکھے گا اور اپنے دوست ممالک اور شراکت داروں کے ساتھ مل کر کام کرتا رہے گا۔
انہوں نے یہ بات ایران کے صدر مسعود پزشکیان سے ٹیلی فون پر گفتگو کے دوران کہی۔
دونوں رہنماؤں کے درمیان تقریبا ً45 منٹ تک جاری رہنے والی گفتگو خوشگوار اور دوستانہ ماحول میں ہوئی، جس میں موجودہ علاقائی صورتحال پر تفصیلی تبادلہ خیال کیا گیا۔
وزیرِاعظم شہباز شریف نے ایرانی قیادت کا شکریہ ادا کیا کہ انہوں نے 11 اور 12 اپریل کو اسلام آباد میں ہونے والے مذاکرات کے پہلے دور کے لیے اعلی سطح وفد پاکستان بھیجا۔ اس وفد کی قیادت ایران کی پارلیمنٹ کے سپیکر محمد باقر قالیباف اور وزیرخارجہ عباس عراقچی نے کی۔
وزیرِاعظم نے صدرپزشکیان کو اپنے حالیہ سفارتی رابطوں سے بھی آگاہ کیا، جن میں سعودی عرب ٗ قطر اور ترکیہ کی قیادت کے ساتھ بات چیت شامل ہے۔
انہوں نے کہا کہ یہ روابط جنگ سے متاثرہ خطے میں پائیدار امن کے قیام کے لیے مکالمے اور سفارت کاری کے عمل کو آگے بڑھانے میں مددگار ثابت ہو رہے ہیں۔
وزیرِاعظم نے اس بات پر بھی ایرانی قیادت کا شکریہ ادا کیا کہ انہوں نے پاکستان کے چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیرکے حالیہ دورہ تہران کے دوران تعمیری گفتگو کی۔
صدر پزشکیان نے بھی وزیرِاعظم اور فیلڈ مارشل سید عاصم منیر کا امن کی کوششوں میں پاکستان کے مضبوط عزم پر شکریہ ادا کیا اور اس بات کا اظہار کیا کہ ایران اور پاکستان کے تعلقات آنے والے دنوں میں مزید مضبوط ہوں گے۔