اسلام آباد(پی ایم این)سکیورٹی فورسز نے بنوں میں خفیہ اطلاعات کی بنیاد پر کارروائی کے دوران بھارت کے حمایت یافتہ فتنہ الخوارج سے تعلق رکھنے والے دو خوارج کو ہلاک کر دیا ہے۔
آئی ایس پی آر کے مطابق خارجی سرغنہ وحید اللہ عرف مختیار ایک خودکش حملہ آور سمیت مارا گیا۔ خوارج سے ایک خودکش جیکٹ، اسلحہ اور گولہ بارود بھی برآمد ہوا ہے۔
خارجی سرغنہ وحید اللہ سکیورٹی فورسز کے اہلکاروں اور معصوم شہریوں پر حملوں سمیت متعدد دہشت گردانہ سرگرمیوں میں ملوث ہونے کی وجہ سے انتہائی مطلوب دہشت گردوں میں شامل تھا، وہ اس سال 21 فروری کو ضلع بنوں میں ہونے والے خودکش بمبار کا بھی مرکزی ہینڈلر تھا، اس واقعہ میں لیفٹیننٹ کرنل گل فراز شہید ہوئے تھے۔
آئی ایس پی آر نے اپنے بیان میں کہا کہ کارروائی کے دوران اس گھناؤنے فعل کا بدلہ لیا گیا اور مرکزی مجرم کو کیفر کردار تک پہنچایا گیا جبکہ سکیورٹی فورسز کی بروقت کارروائی سے بڑی تباہی کا خطرہ بھی روکا گیا۔
علاقے میں ممکنہ طور پر موجود بھارتی حمایت یافتہ خوارج کے خاتمے کیلئے کلیئرنس آپریشن کیا جا رہا ہے۔