وزیراعظم کی پاکستان ریلویز کو جدید سفری نظام میں تبدیل کرنے کی ہدایت
Share
April 06, 2026
اسلام آباد(پی ایم این )وزیراعظم محمد شہباز شریف نے پاکستان ریلویز کو ایک جدید، محفوظ اور قابلِ اعتماد سفری نظام میں تبدیل کرنے کے لئے اصلاحاتی اقدامات تیز کرنے کی ہدایت کی ہے۔
انہوں نے یہ بات وزیر ریلوے حنیف عباسی سے گفتگو کرتے ہوئے کہی جنہوں نے اسلام آباد میں ان سے ملاقات کی۔
وزیراعظم نے وزیر ریلویز کو ہدایت کی کہ ریلوے کے جاری منصوبوں کی بروقت تکمیل کو یقینی بنایا جائے اور عوام کو بہتر، محفوظ اور سستی سفری سہولیات فراہم کرنے کے لئے تمام وسائل بروئے کار لائے جائیں۔
شہباز شریف نے کہا کہ موجودہ معاشی حالات کے تناظر میں حکومت عوام پر اضافی بوجھ ڈالنے سے گریز کر رہی ہے۔
انہوں نے ریلوے کے نظام کو بہتر بنا کر آمدنی بڑھانے پر زور دیا۔
وزیراعظم نے اس عزم کا اظہار کیا کہ حکومت عوامی فلاح و بہبود کے ایجنڈے پر کاربند ہے اور تمام اداروں کی کارکردگی کو بہتر بنا کر ملک کو ترقی کی راہ پر گامزن کیا جائے گا۔
وزیر ریلویز نے وزیراعظم کو پاکستان ریلوے کے آپریشنل معاملات پر بریفنگ دیتے ہوئے کہا کہ خلیج کی موجودہ صورتحال میں عوامی سہولت کو مدنظر رکھتے ہوئے ملک بھر میں چلنے والی تمام آپریشنل ٹرینوں کے کرایوں میں کسی قسم کا اضافہ نہیں کیا جا رہا۔