حکومت نے اوورسیز پاکستانیوں کے لیے فلاحی اقدامات کو وسعت دی ہے: قومی اسمبلی
حکومت نے اوورسیز پاکستانیوں کے لیے فلاحی اقدامات کو وسعت دی ہے: قومی اسمبلی
March 09, 2026
اسلام آباد(پی ایم این):قومی اسمبلی کو بتایا گیا کہ حکومت نے رواں برسوں کے دوران بیرون ملک مقیم پاکستانیوں اور ان کے خاندانوں کے لیے اپنے فلاحی، تعلیمی اور رہائش کے اقدامات کو وسعت دی ہے۔
بیرون ملک مقیم پاکستانیوں کے امور کے وزیر مملکت عون ثقلین نے وقفہ سوالات کے دوران ایک سوال کے جواب میں کہا کہ بیرون ملک مقیم پاکستانی کے انتقال اور معذوری کی صورت میں ان پاکستانیوں کے بے سہارا خاندانوں کو مالی امداد فراہم کی جاتی ہے۔
انہوں نے کہا کہ میتوں اور شدید علیل پاکستانیوں کو پاکستان کے بین الاقوامی ہوائی اڈوں سے ان کے آبائی شہروں تک لے جانے کے لیے مفت ایمبولینس سروس دستیاب ہے۔
انہوں نے کہا کہ وفات پا جانے والے اوورسیز پاکستانیوں کے ضرورت مند اور بے سہارا خاندانوں کے لیے پچیس ہزار کی جنازہ گرانٹ فراہم کی جاتی ہے۔
عون ثقلین نے کہا کہ شکایات کے فوری حل کے لیے اوورسیز پاکستانیز فانڈیشن کے آن لائن کمپلینٹ مینجمنٹ سسٹم کو پرائم منسٹر ڈیلیوری یونٹ کے پاکستان سٹیزن پورٹل سے منسلک کر دیا گیا ہے۔
انہوں نے کہا کہ او پی ایف نے آزاد کشمیر سمیت ملک بھر میں ستائیس تعلیمی ادارے قائم کیے ہیں۔
ایک سوال کے جواب میں امورداخلہ کے وزیر مملکت طلال چوہدری نے کہا کہ اسلام آباد میں خواتین کو محفوظ، معاون اور صنفی حساس ماحول فراہم کرنے کے لیے تھانوں میں خواتین کے لیے سہولت ڈیسک قائم کیے گئے ہیں۔
وزیر مملکت نے کہا کہ سیف سٹی اسلام آباد کے ہاسٹلز، ہوٹلوں اور گیسٹ ہائوسز کا ڈیجیٹل ریکارڈ رکھا جا رہا ہے۔
ایوان کا اجلاس اب کل دن بارہ بجے ہوگا۔