تازہ جوابی حملوں میں افغان رجیم کے 67 کارندے ہلاک ہوئے،وزیراطلاعات

March 03, 2026

اسلام آباد(پی ایم این)سکیورٹی فورسز نے بلوچستان اور خیبرپختونخوا میں مختلف مقامات پر افغان طالبان رجیم کے زمینی حملوں کو مؤثر طریقے سے پسپا کرتے ہوئے افغان طالبان کے 67 کارندوں کو ہلاک اور سینکڑوں کو زخمی کر دیا۔

وزیر اطلاعات و نشریات عطاء اللہ تارڑ نے اپنے ایکس ہینڈل پر آپریشن غضب للحق کی تازہ پیشرفت سے آگاہ کرتے ہوئے کہا کہ افغان طالبان رجیم نے شمالی بلوچستان میں قلعہ سیف اللہ، نوشکی اور چمن کے اضلاع میں 16 مقامات پر زمینی حملے کئے، جبکہ 25 مقامات پر مسلح افواج کے خلاف فائر ریڈ کی کارروائیاں کیں۔

انہوں نے کہا کہ تمام مقامات پر حملوں کو مؤثر طور پر پسپا کر دیا گیا، جس کے نتیجے میں افغان طالبان کے 27 کارندے ہلاک اور متعدد زخمی ہوئے۔

انہوں نے کہا کہ مادر وطن کا دفاع کرتے ہوئے ایف سی بلوچستان نارتھ کا ایک جوان شہید جبکہ 5 جوان زخمی ہوئے۔

وزیراطلاعات نے مزید کہا کہ خیبرپختونخوا میں ایک مقام پر زمینی حملے کی کوشش کی گئی جبکہ 12 مقامات پر فائر ریڈ کیا گیا، جنہیں بغیر کسی جانی نقصان کے ناکام بنا دیا گیا۔
انہوں نے کہا کہ خیبرپختونخوا میں رات بھر جاری کارروائیوں کے دوران افغان طالبان کے 40 کارندے ہلاک ہوئے۔