وفاقی وزیر داخلہ محسن نقوی کی پولینڈ کے ہم منصب اور وزیر سپشل سروسز(انٹیلیجنس ) سے ملاقاتیں، دو طرفہ تعلقات ، داخلی سلامتی اور انٹیلیجنس شیئرنگ کے امور پر تبادلہ خیال
وارسا۔27فروری (پی ایم این):وفاقی وزیر داخلہ محسن نقوی نے پولینڈ کے ہم منصب مارسن کیئرونسکی اور وزیر سپشل سروسز(انٹیلیجنس ) ٹامسز سیمونیک سے ملاقاتیں کیں جن میں دونوں ممالک کے مابین دو طرفہ تعلقات ، داخلی سلامتی اور انٹیلیجنس شیئرنگ کے امور پر تبادلہ خیال کیا گیا ۔پاکستان اور پولینڈ کا غیر قانونی امیگریشن پر قابو پانے کیلئے ادارہ جاتی تعاون بڑھانے،بارڈر سکیورٹی اور منظم جرائم کے سدباب سمیت مختلف شعبوں میں اشتراک کار بڑھانے پر بات چیت کی گئی ۔
ملاقات میں پولیس، پیرا ملٹری فورسز اور انٹیلیجنس اداروں کے مابین روابط مضبوط بنانے پر زور دیا گیا ۔ وزیر داخلہ محسن نقوی نے قانونی امیگریشن کے عمل کو آسان بنانے پر زور دیا۔پولینڈ کے وزیر داخلہ نے انسانی سمگلنگ کے تدارک کے سلسلے میں حکومت پاکستان کی جانب سے لئے گئے اقدامات کو سراہا۔پولینڈ میں پاکستان کے سفیر محمد سمیع اور ڈی جی ایف آئی اے ڈاکٹر عثمان انور بھی اس موقع پر موجود تھے۔