پاکستان اور چین کا جعلی خبروں کے خلاف مشترکہ نشریاتی تعاون بڑھانے پر اتفاق
اسلام آبا(پی ایم این)پاکستان اور چین نے جعلی خبروں اور غلط معلومات سے موثر طریقے سے نمٹنے کیلئے چین اور پاکستان کے سرکاری نشریاتی اداروں کے درمیان روابط اور مشترکہ نشریاتی منصوبوں کو مزید بڑھانے پر اتفاق کیا ہے۔
یہ اتفاق رائے بیجنگ میں وفاقی وزیر اطلاعات ونشریات عطا اللہ تارڑ اور سی پی سی سینٹرل کمیٹی کے شعبہ تشہیر کی نائب سربراہ، وزیر اور پارٹی سیکرٹری برائے نیشنل ریڈیو اینڈٹیلی ویژن ایڈمنسٹریشن چائنہ کائو شو مِن کے
درمیان ملاقات میں سامنے آیا۔
دونوں رہنمائوں نے جعلی خبروں کے خلاف مشترکہ بیانیے پر بھی اتفاق کیا اور تکنیکی تربیت اور ادارہ جاتی تعاون پر زور دیا۔
معلومات کے تبادلے اور تعاون کو فروغ دینے کیلئے چائنہ سینٹرل ٹیلی ویژن اور پاکستان ٹیلی ویژن کے درمیان مجوزہ معاہدے پر بھی بات چیت ہوئی۔
وزیر اطلاعات نے کہا کہ پاکستان دوطرفہ میڈیا تعاون کو عملی اقدامات میں تبدیل کرنے کیلئے تیار ہے۔
وزیر اطلاعات نے حالیہ پاکستان بھارت کشیدگی کا حوالہ دیتے ہوئے کہا کہ چین اور پاکستان کے نوجوانوں نے ایک دوسرے کے ساتھ بھرپور یکجہتی کا اظہار کیا جو سوشل میڈیا پر وائرل ہوا۔
Cao Shumin نے کہا کہ چین پاکستان کو قابل اعتماد شراکت دار سمجھتا ہے۔ انہوں نے کہا کہ پاکستان اور چین کے میڈیا ادارے تجربات کے تبادلے سے قریب آ سکتے ہیں۔