صدر اوروزیراعظم کاحضرت امام حسین کو خراج عقیدت
اسلام آبا(پی ایم این)صدر آصف علی زرداری اور وزیراعظم شہباز شریف نے حضرت امام حسین رضی اللہ تعالیٰ عنہ اور ان کے ساتھیوں کی عظیم قربانی کو بھرپور خراج عقیدت پیش کرتے ہوئے کہا ہے کہ یوم عاشور ہمیں قربانی،صداقت اور حق کے لیے کھڑے ہونے کا پیغام دیتا ہے۔
آج (اتوار) یوم عاشور پر اپنے الگ الگ پیغامات میں انہوں نے قوم پر زور دیا کہ وہ شہدائے کربلا کی ثابت قدمی اوربلند حوصلے کی اقدار اور اصولوں کو برقرار رکھے اور آزمائش و مشکلات میں ثابت قدمی کا مظاہرہ کرے۔
صدر آصف علی زرداری نے کہا کہ یہ دن نہ صرف قربانی، وفاداری اور صبر کی بے مثال داستان ہے بلکہ روشنی کا ایک مینار بھی ہے جو ہر دور کے اندھیروں میں حق و صداقت کا راستہ دکھاتا ہے۔
اپنے پیغام میں وزیر اعظم شہباز شریف نے کہا کہ واقعہ کربلا ہمیں درس دیتا ہے کہ حق کا راستہ اگرچہ کٹھن ہے لیکن یہ وہ راستہ ہے جو اللہ تعالی کی رضا ،سکون قلب اور ابدی خوشحالی کی طرف لے جاتا ہے۔
پنجاب کی وزیراعلیٰ مریم نواز نے آج یوم عاشور پراپنے پیغام میں کہا کہ اہل بیت سے محبت ہرمسلمان کے عقیدے اور ایمان کا حصہ ہے اور یوم عاشور پرہمیں حضرت امام حسین کی روشن اورعظیم تعلیمات پرعمل پیرا ہونے کے عزم کا اعادہ کرنا چاہیے ۔
گورنرسندھ کامران خان ٹیسوری نے یوم عاشور کے موقع پر اپنے پیغام میں کہا کہ حضرت امام حسین اور ان کے رفقاء نے یزیدیت کوچیلنج کیا اور حق کیلئے اپنی جانیں قربان کیں مگر باطل کے سامنے سرنہیں جھکایا ۔
انہوں نے کہا کہ یوم عاشور ہمیں صبر ، قربانی ، بہادری ، سچائی کا ساتھ دینے اور حق کی پیروی کرنے کا درس دیتا ہے ۔