کراچی،راشن دینے کے بہانے خاتون سے مبینہ زیادتی،ملزم گرفتار

کراچی(پی ایم این)ضلع کماڑی میں پولیس نےراشن دینےکے بہانے خاتون سے مبینہ زیادتی کرنیوالا مرکزی ملزم گرفتارکرلیا،متاثرہ خاتون نے ماڑی پولیس کوبیان میں ملزم سیف اللہ اور اس کے دوست عبدالرزاق کے خلاف مقدمہ درج کروایا تھا۔ مدعیہ کے مطابق بلدیہ ٹاؤن 24 مارکیٹ میں ملزم سیف اللہ کی دکان ہے، جہاں اس کی ایک جاننے والی خاتون نسرین اسے لے کر گئی تھی۔نسرین نے اسے یقین دلایا تھا کہ سیف اللہ ایک اچھا آدمی ہے اور اسے راشن دلوا دے گا۔مقدمے کے متن کے مطابق ملزم سیف اللہ نے موقع پر اپنے دوست عبدالرزاق کو بلوایا اور خاتون کو کار میں بٹھا لیا۔
ملزمان خاتون کو کار میں بٹھا کر ہاکس بے ڈیم کے کچے راستے پر لے گئے۔ وہاں اچانک عبدالرزاق نے پستول نکال کر خاتون پر تان دی اور اس کے ساتھ زبردستی زیادتی کی، جس کے بعد دوسرے ملزم سیف اللہ نے بھی کار کے اندر خاتون کو زیادتی کا نشانہ بنایا۔ ملزمان نے اس گھناؤنے فعل کے دوران خاتون کی نازیبا ویڈیوز بھی بنائیں۔
متاثرہ خاتون نے ایف آئی آر میں مزید بتایا کہ زیادتی کے بعد ملزمان نے اسے بدنام کرنے کی دھمکی دی، ہاتھ میں 2 ہزار روپے تھمائے اور حب ریور روڈ پر کار سے اتار کر فرار ہو گئے۔
پولیس نے خاتون کی مدعیت میں مقدمہ درج کر کے ایک ملزم کو دھر لیا ہے جبکہ دوسرے ملزم اور سہولت کار کی گرفتاری کے لیے چھاپے مارے جا رہے ہیں۔