لاہور(پی ایم این/خالدمحمود)صوبائی وزیر اطلاعات و ثقافت پنجاب عظمیٰ بخاری سے پاکستان مسلم لیگ (ن) کے دیرینہ کارکن صابر محمود ہاشمی نے ملاقات کی۔ ملاقات کے دوران ملک کی مجموعی سیاسی و معاشی صورتحال اور پنجاب حکومت کے جاری ترقیاتی منصوبوں پر تفصیلی تبادلہ خیال کیا گیا۔
ملاقات میں صابر محمود ہاشمی نے وزیر اعلیٰ پنجاب اور صوبائی حکومت کی جانب سے عوامی فلاح و بہبود کے لیے اٹھائے گئے اقدامات اور ترقیاتی کاموں کو سراہتے ہوئے حکومت کی کارکردگی پر مکمل اعتماد کا اظہار کیا۔
اس موقع پر صوبائی وزیر اطلاعات عظمیٰ بخاری نے صابر محمود ہاشمی کی پارٹی کے لیے طویل خدمات اور قربانیوں کو خراج تحسین پیش کیا۔ عظمیٰ بخاری کا کہنا تھا کہ مسلم لیگ (ن) کے مخلص کارکنان پارٹی کا اصل سرمایہ ہیں، جنہوں نے سابقہ دورِ حکومت میں بدترین انتقامی کارروائیوں اور سختیوں کا ڈٹ کر مقابلہ کیا۔ انہوں نے اس بات کا اعتراف کیا کہ گزشتہ دورِ حکومت میں صابر محمود ہاشمی کو بے بنیاد اور ناجائز مقدمات میں الجھایا گیا، جس کے باعث انہیں اور ان کے خاندان کو شدید معاشی و مالی مشکلات کا سامنا کرنا پڑا، تاہم تمام تر دباؤ کے باوجود وہ پارٹی قیادت کے ساتھ ثابت قدمی سے کھڑے رہے۔
وزیر اطلاعات نے مزید کہا کہ پارٹی قیادت مشکل وقت میں ثابت قدم رہنے والے کارکنوں کی قربانیوں کو قدر کی نگاہ سے دیکھتی ہے اور ان کے مسائل کے حل کے لیے ہر ممکن تعاون جاری رکھا جائے گا۔

