لاہور(پی ایم این/خالدمحمود)اسپیکر پنجاب اسمبلی ملک محمد احمد خان کا کہنا ہےکہ ان کے وزیراعلیٰ پنجاب بننے کی خبر کو افواہ سمجھا جائے، وزیراعلیٰ بننےکی خبر میں کوئی حقیقت نہیں ہے۔کمالیہ میں میڈیا سےگفتگو میں اسپیکر پنجاب اسمبلی ملک محمد احمد خان کا کہنا تھا کہ ان افواہوں کو اہمیت نہ دی جائے، سیاسی جنگ آپس میں چلتی رہتی ہے، سیاست میں یہ سلسلہ جاری رہنا چاہیے، سیاسی کشمکش نہ ہو تو سیاست میں مزہ نہیں آتا۔
ملک محمد احمد خان کا کہنا تھا کہ وہ سرکاری افسران کے بے جا اختیارات کے خلاف ہیں، سرکاری اختیارات عوامی نمائندوں کے پاس ہونے چاہئیں۔ملک محمد احمد خان کا کہنا تھا کہ پاکستان اس وقت بہت بڑی مشکل سے گزر رہا ہے، افغانستان کی سرزمین پر بیٹھے کچھ عناصر پاکستان کو نقصان پہنچا رہے ہیں۔ان کا کہنا تھا کہ ہماری انٹیلیجنس ایجنسیاں، پولیس اور سکیورٹی فورسز شرپسند عناصر کا مقابلہ کر رہی ہیں، شہری بھی ملک میں امن و امان کے قیام کے لیے اپنا کردار ادا کر رہے ہیں۔
دوسری جانب جیو نیوز کے پروگرام’ آج شاہ زیب خانزادہ کیساتھ’ میں گفتگو کرتے ہوئے ملک محمد احمد خان کا کہنا تھا کہ صوبوں سے متعلق ریفرنڈم پر کچھ کہنا ابھی قبل از وقت ہے، سوال یہ بھی ہےکہ اس وقت کیا کسی ایوان نے ریفرنڈم مانگا ہے؟اسپیکر پنجاب اسمبلی کا کہنا تھا کہ تینوں جماعتوں نے مذاکرات کے ذریعےکسی نتیجے پر پہنچنےکی کوشش کی مگر نہیں پہنچیں، اگر عوام خود ایک بات کہہ دیں تو پھر ان کے نمائندے اس کے خلاف کیسے بات کرسکتے ہیں، میرے حلقے میں ٹکٹ یا امیدوار کی نامزدگی کامیابی کی علامت سمجھی جاتی ہے، پارٹی میں کسی چیز پر اختلاف ہو تو اپنی بات کہتا ہوں اور قیادت میری بات سنتی ہے۔

