لاہور(پی ایم این/حامد محمود مغل)تھانہ نواب ٹائون میں مبینہ طور پر طالبعلم سے پیسے مانگنے پر تھانیدار کے خلاف گداگری سے متعلق دفعات پر مقدمہ درج کرلیا گیا۔
پولیس کے مطابق مقدمہ سب انسپکٹر محمد بوٹا کی مدعیت میں درج کیا گیا ہے، جس میں تھانیدار دانیال پر طالب علم سے رقم طلب کرنے کا الزام عائد کیا گیا ہے۔
ایف آئی آر کے متن کے مطابق ملزم افسر نے ایک یونیورسٹی کے طالب علم سے پیسوں کا مطالبہ کیا، جس کے بعد واقعے کی تحقیقات شروع کی گئیں۔پولیس حکام کا کہنا ہے کہ مقدمہ گداگری سے متعلق دفعات کے تحت درج کیا گیا ہے اور معاملے کی مختلف پہلوؤں سے چھان بین جاری ہے۔ تحقیقات کی روشنی میں مزید قانونی کارروائی عمل میں لائی جائے گی۔
پولیس کا مؤقف ہے کہ قانون سب کے لیے برابر ہے اور کسی بھی سرکاری اہلکار کی جانب سے اختیارات کے ناجائز استعمال یا غیر قانونی اقدام کو برداشت نہیں کیا جائے گا۔ حکام کے مطابق شفاف تحقیقات کے بعد ذمہ دار عناصر کے خلاف قانون کے مطابق کارروائی کی جائے گی۔