لاہور( پی ایم این/حامد مغل)شاہدرہ اور راوی روڈ پر پولیس کی 2 کارروائیوں میں 2اشتہاریوں کو گرفتار کرلیا۔
پولیس کے مطابق شاہدرہ پولیس معمول کے گشت پر تھی کہ تین مشکوک افراد کو رکنے کا اشارہ کیا گیا۔ ملزمان نے پولیس کو دیکھتے ہی فائرنگ شروع کر دی، جس کے بعد جوابی کارروائی میں ایک ملزم زخمی ہو گیا اور اسے گرفتار کر لیا گیا، جبکہ اس کے ساتھی فرار ہونے میں کامیاب ہوگئے۔
ادھر راوی روڈ پولیس نے بتی چوک کے قریب دو موٹرسائیکل سواروں کو رکنے کا اشارہ کیا۔ پولیس کے مطابق ملزمان نے فرار ہونے کی کوشش کی تاہم تیز رفتاری کے باعث موٹرسائیکل کا توازن برقرار نہ رکھ سکے اور گر گئے۔ اس دوران ایک ملزم زخمی حالت میں گرفتار کر لیا گیا۔
پولیس نے بتایا کہ زخمی ملزم کی شناخت زین خالد کے نام سے ہوئی ہے جسے طبی امداد کے لیے ہسپتال منتقل کر دیا گیا۔ ابتدائی تحقیقات کے دوران انکشاف ہوا کہ گرفتار زخمی ملزمان ڈکیتی، اغواء اور چوری سمیت 30 سے زائد وارداتوں میں ریکارڈ یافتہ ہیں۔