لاہور(پی ایم این)پنجاب حکومت نے پنشن اخراجات پر قابو پانے کیلئے اصلاحات پلان تیار کرلیا جس سے کھربوں روپے کی بچت متوقع ہے
حکومت بڑھتے ہوئے پنشن بوجھ کو کم کرنے کے لیے مختلف مالیاتی حکمت عملیوں پر کام کر رہی ہے، جبکہ پنشن اخراجات میں کمی کو نئے مالی سال کی اہم ترجیحات میں شامل کیا گیا ہے۔حکام کا کہنا ہے کہ مجوزہ اصلاحات کا مقصد سرکاری وسائل کا مؤثر استعمال، مالیاتی نظم و ضبط کا فروغ اور مستقبل میں پنشن ادائیگیوں کے نظام کو پائیدار بنانا ہے۔
حکومتی تخمینوں کے مطابق موجودہ پنشن اصلاحات کے نتیجے میں آئندہ 10 برسوں کے دوران تقریباً 2.9 ٹریلین روپے کی بچت متوقع ہے۔ اس کے علاوہ کمیوٹیشن ادائیگیوں میں تاخیر کے باعث تقریباً 100 ارب روپے کا اضافی مالی بوجھ بھی مؤخر کیا جا سکے گا۔اصلاحاتی منصوبے کے تحت مجموعی پنشن واجبات کو 11.9 ٹریلین روپے سے کم کرکے 5.7 ٹریلین روپے تک لانے کا ہدف مقرر کیا گیا ہے، جس سے صوبے کی مالی پوزیشن مزید مستحکم ہونے کی امید ہے۔