فائل فوٹو

اسلام آباد(پی ایم این)پاکستان نے خلیجی ممالک کی خودمختاری، علاقائی سالمیت اور سلامتی کے تحفظ پر زور دیتے ہوئے تمام حملوں کی غیر مشروط مذمت کی ہے۔اقوام متحدہ میں پاکستانی مندوب سید حیدر شاہ نےکہا ہےکہ پاکستان برادر خلیجی ممالک کی حکومتوں اورعوام کے ساتھ مکمل یکجہتی کا اظہار کرتا ہےسعودی عرب پرحوثی ملیشیا کے حملے اوردھمکیاں ناقابل قبول ہیں، سعودی شہری تنصیبات اور تجارتی جہازوں کو نشانہ بنانے کی شدید مذمت کرتے ہیں۔

پاکستانی مندوب نےکہاکہ آبنائے ہرمز اور باب المندب میں جہازوں پر حملے عالمی تجارت کےلیےخطرہ ہیں،آبنائے ہرمز سے عالمی خام تیل اور کھادکی تجارت کا بڑا حصہ گزرتا ہے،سمندری راستوں میں کشیدگی عالمی امن، علاقائی استحکام اور توانائی کی قیمتوں کو متاثر کر رہی ہے۔سید حیدرشاہ نے مطالبہ کیا کہ آبنائے ہرمز میں جہازوں کی محفوظ اور بلا رکاوٹ آمدورفت یقینی بنائی جائے،سلامتی کونسل شہریوں،تجارتی جہازوں اور انکے عملے کے تحفظ کے لیے متحد ہو۔

انہوں نےکہاکہ تنازعات کےحل کے لیےکشیدگی میں کمی، مذاکرات اور سفارتکاری کو ترجیح دی جائے،تمام فوجی اشتعال انگیزیوں اورغیرقانونی حملوں کا سلسلہ بند ہونا چاہیے،پاکستان خطےمیں پائیدار امن، استحکام اور سمندری سلامتی کے لیے سفارتی کوششیں جاری رکھے گا۔

By PMN