سکرین شاٹ

لاہور(پی ایم این)سابق کپتان محمد یوسف اور ثناء میر پاکستان کرکٹ بورڈ (پی سی بی) ہال آف فیم 2025 میں شامل ہوگئیں۔پی سی بی کے مطابق محمد یوسف اور ثناء میر کو نمایاں خدمات کے اعتراف میں ہال آف فیم میں شامل کیا گیا ہے۔پی سی بی  کا کہنا ہے کہ محمد یوسف کا انتخاب آزادانہ اور شفاف ووٹنگ کے ذریعے  جبکہ ثناء میرکو آئی سی سی ہال آف فیم میں شمولیت کی بنیاد پر پی سی بی ہال آف فیم کا حصہ بنایا گیا ہے، محمد یوسف اور ثناء میر سے قبل پی سی بی ہال آف فیم میں 14 عظیم کھلاڑی شامل تھے۔

 اس کے علاوہ  عبدالحفیظ کاردار، فضل محمود، حنیف محمد، ظہیرعباس،  عمران خان، جاوید میانداد،  عبدالقادر،  وسیم اکرم،  وقاریونس ، انضمام الحق، مشتاق محمد، سعید انور، مصباح الحق، یونس خان بھی پی سی بی ہال آف فیم میں شامل ہیں۔

محمد یوسف نے 381 انٹرنیشنل میچز میں 17 ہزار 300 رنز بنائے جبکہ 2006 میں ٹیسٹ کرکٹ میں 1788 رنز بنا کر عالمی ریکارڈ قائم کیا، دوسری جانب ثناء میر نے 226 انٹرنیشنل میچز میں 240 وکٹیں حاصل کرنے کے ساتھ 2432 رنز بھی بنائے، ثناء میر کی قیادت میں پاکستان نے 2010 اور 2014 کے ایشین گیمز میں طلائی تمغے جیتے۔اس حوالے سے چیئرمین پی سی بی محسن نقوی نے بھی محمد یوسف اورثناء میرکو پی سی بی ہال آف فیم میں شمولیت پر مبارکباد پیش کرتے ہوئے کہا کہ محمد یوسف اورثناء میر نے فخر کے ساتھ پاکستان کی نمائندگی کی، محمد یوسف اورثناء میر نے اپنی کارکردگی سےکرکٹ میں منفرد مقام بنایا۔

By PMN