لندن(پی ایم این)انڈین پریمیئر لیگ (آئی پی ایل) کے بانی اور سابق چیئرمین للت مودی نے برطانوی شہریت حاصل کرنے کا اعلان کردیا۔ للت مودی نے 14 نومبر کو آکسفورڈ یونین سے خطاب کے دوران انکشاف کیا کہ وہ باضابطہ طور پر 15 ستمبر 2026 کو برطانوی شہری بن چکے ہیں، جس کی کچھ تصاویر انہوں نے سوشل میڈیا پر بھی شیئر کیں۔
للت مودی نے برطانوی شہریت ملنے کو اپنی زندگی کا ایک اہم اور قابلِ فخر سنگِ میل قرار دیا اور کہا کہ برطانیہ کئی برسوں سے ان کا گھر رہا ہے اور وہ یہاں کے عوام، اداروں، روایات اور اقدار کا گہرا احترام کرتے ہیں۔ ان کا کہنا تھا کہ برطانوی شہریت حاصل کرنا نہ صرف ایک اعزاز ہے بلکہ ایک بڑی ذمہ داری بھی ہے، جسے وہ فخرکے احساس کے ساتھ قبول کرتے ہیں اور وہ مستقبل میں بھی برطانیہ کے لیے مثبت کردار ادا کرنے کے خواہاں ہیں۔
یاد رہے کہ 2010 میں آئی پی ایل سے منسلک مبینہ مالی بے ضابطگیوں کی تحقیقات کے دوران للت مودی بھارت چھوڑ کر برطانیہ منتقل ہو گئے تھے اور اس وقت سے وہ وہیں سکونت اختیار کیے ہوئے ہیں۔

