ترکیہ کے صدر رجب طیب ایردوان نے وزیراعظم شہباز شریف کی امن کوششوں کو سراہتے ہوئے خطے میں امن کے قیام کیلئے پاکستان کے سفارتی اقدام کی مسلسل حمایت کا یقین دلایا ہے۔
انہوں نے ان خیالات کا اظہار ترکیہ میں پانچویں انطالیہ ڈپلومیسی فورم کے موقع پر وزیراعظم سے دو طرفہ ملاقات کے دوران کیا۔
ملاقات میں دونوں رہنماؤں نے حالیہ علاقائی پیشرفت، خصوصاً مشرق وسطیٰ کی تازہ ترین صورتحال پر تبادلہ خیال کیا۔
وزیراعظم نے صدر ایردوان کی جانب سے پاکستان کی امن کوششوں کی مضبوط ،مؤثرحمایت اور حوصلہ افزائی پر ان کا شکریہ ادا کیا اور انہیں جنگ بندی میں توسیع اور مذاکرات کی بحالی کے حوالے سے پیشرفت سے آگاہ کیا تاکہ ایک امن معاہدہ طے پا سکے۔
انہوں نے اس بات پر زور دیا کہ پائیدار اور دیرپا علاقائی امن کے حصول کے لئے موجودہ موقع سے مؤثر طور پر فائدہ اٹھایا جائے۔