کامیاب جنگ بندی اور مذاکرات سفارتکاری اور مکالمے کی فتح ہے: رضوان سعید
اسلام آباد(پی ایم این )امریکہ میں پاکستان کے سفیر رضوان سعید شیخ نے کہا ہے کہ مشرق وسطیٰ میں کامیاب جنگ بندی اور مذاکرات سفارتکاری اور مکالمے کی فتح ہے۔
امریکی نشریاتی ادارے سی این این کے ساتھ ایک انٹرویو میں انہوں نے کہا کہ پاکستان کی جانب سے سفارتی کوششیں گذشتہ ہفتوں سے جاری تھیں جن کا اختتام کامیاب جنگ بندی اور مذاکرات کے اعلان کے ساتھ ہوا۔
انہوں نے کہا کہ پاکستان نے اپنی تاریخ میں ہمیشہ مثبت سفارت کاری کو اولیت اور ترجیح دی ہے اور ہم فریقین کی جانب سے پاکستان پر اعتماد کرنے پر ان کے مشکور ہیں۔
انہوں نے کہا کہ ملک کی اعلیٰ ترین قیادت نے سفارتی کوششوں میں براہ راست کردار ادا کیا۔
انٹرویو میں امریکہ، ایران جنگ بندی کے حوالے سے پاکستان کے مثبت کردار اور سفارتی کوششوں پر بات چیت کی گئی۔رضوان سعید نے کہا کہ سفارت کاری کو کامیاب بنانے کے اس عمل میں سعودی عرب، ترکیہ، مصر، قطر، چین اور دیگر تمام ملکوں کے شکر گزار ہیں جن کی مشترکہ کاوشوں سے جنگ بندی عمل میں آئی اور مذاکرات کا رستہ کھلا، چین نے روزِ اول سے فریقین کو تحمل اور سفارت کاری کا راستہ اختیار کرنے پر زور دیا ہے۔
انہوں نے کہا کہ پاکستان محض ایک سہولت کار ہے اور ہم پوری دیانتداری سے کوشش کر رہے ہیں۔ مذاکراتی عمل کی کامیابی راز داری کی متقاضی ہے، فریقین کے پاس بغیر کسی دبا کے فیصلہ کن مذاکرات کا اختیار ہے۔
پاکستانی سفیر نے کہا کہ پاکستان کے خلیجی ممالک کے ساتھ دیرینہ تعلقات ہیں اور خلیجی ریاستوں میں پچپن لاکھ کے لگ بھگ پاکستانی مقیم ہیں۔
ان کا کہنا تھا کہ سفارتی کاوشوں اور جنگ بندی کے اس عمل کے دوران خلیجی ریاستوں کی اعلیٰ قیادت سے مسلسل مشاورت رہی ہے۔ انہوں نے کہا کہ خطے میں امن اور استحکام کا نہ صرف خلیج بلکہ دنیا بھر کی سیاست اور معیشت پر بھی مثبت اثر ہوگا ۔