February 11, 2026
لاہور(پی ایم این):وزیراعظم محمد شہباز شریف نے گزشتہ جمعہ کو اسلام آباد کے علاقے ترلائی کی خدیجتہ الکبری امام بارگاہ پر ہونے والے دہشتگرد حملے میں شہید عون عباس کی بے مثال شجاعت کے اعتراف میں ان کے اہل خانہ کے لئے ایک کروڑ روپے اور دیگرہر شہید کے اہل خانہ کیلئے پچاس لاکھ روپے مالی معاونت کا اعلان کیا ہے۔
یہ اعلان انہوں نے اسلام آباد میں جائے وقوعہ کا دورہ کرتے ہوئے کیا۔
وزیراعظم نے شدید زخمی ہونے والوں کو تیس لاکھ روپے جبکہ دیگر زخمیوں کو دس لاکھ روپے دینے کا علان بھی کیا۔
انہوں نے شہید عون عباس کی رہائش گاہ پر بھی جا کر مرحوم کی روح کے ایصال ثواب کے لیے فاتحہ خوانی کی اور سوگوار خاندان سے اظہار تعزیت کیا۔
انہوں نے کہا کہ دہشت گرد حملے کو روکنے میں بہادری کا مظاہرہ کرنے پر شہید عون عباس کو 14 اگست کو بعد از مرگ ایوارڈ دیا جائے گا۔
دورے کے دوران وزیراعظم شہباز شریف نے دہشت گردی کی گھناونی کارروائی کو بربریت کی انتہا قرار دیتے ہوئے اس کی مذمت کی۔
انہوں نے کہا کہ پوری قوم اس ظلم پر غم میں ڈوبی ہوئی ہے اور اس عزم کا اظہار کیا کہ شہدا کی قربانیاں رائیگاں نہیں جائیں گی۔