اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) نے یکم سے 6 جولائی کے دوران ملک کے مختلف علاقوں میں مون سون بارشوں کے پہلے باقاعدہ اسپیل کی پیشگوئی کرتے ہوئے متعلقہ اداروں اور شہریوں کو پیشگی احتیاطی اقدامات اختیار کرنے کی ہدایت جاری کر دی ہے۔
این ڈی ایم اے کے مطابق پنجاب، خیبرپختونخوا، گلگت بلتستان، آزاد کشمیر، شمالی بلوچستان اور بالائی سندھ میں آندھی، تیز ہواؤں اور گرج چمک کے ساتھ بارش متوقع ہے، جبکہ بعض علاقوں میں موسلا دھار بارش بھی ہو سکتی ہے۔
اسلام آباد، راولپنڈی، مری، گلیات، لاہور، گوجرانوالہ، سیالکوٹ، نارووال، گجرات، جہلم، چکوال اور اٹک میں وقفے وقفے سے بارش کی توقع ظاہر کی گئی ہے۔ شمال مشرقی پنجاب اور خطہ پوٹھوہار کے نشیبی علاقوں میں شہری سیلاب کا خدشہ بھی ظاہر کیا گیا ہے۔
جنوبی پنجاب کے ملتان، بہاولپور، بہاولنگر، لودھراں، خانیوال، مظفرگڑھ، ڈیرہ غازی خان، راجن پور، لیہ، بھکر اور میانوالی میں 3 سے 5 جولائی کے دوران بارشوں کی پیشگوئی کی گئی ہے۔
خیبرپختونخوا کے بالائی اضلاع، خصوصاً دیر، سوات، چترال، کوہستان، مانسہرہ، ایبٹ آباد، بٹگرام اور شانگلہ میں شدید بارشوں کے باعث مقامی ندی نالوں میں طغیانی کا امکان ظاہر کیا گیا ہے۔
این ڈی ایم اے نے خبردار کیا ہے کہ گلگت بلتستان اور آزاد کشمیر کے پہاڑی علاقوں میں لینڈ سلائیڈنگ اور مقامی سیلاب کے خطرات بڑھ سکتے ہیں۔ استور، سکردو، گلگت، ہنزہ، دیامر، غذر، شگر، گھانچے، مظفرآباد، نیلم ویلی، راولاکوٹ، باغ، حویلی، پونچھ، کوٹلی، بھمبر اور میرپور میں خصوصی احتیاط برتنے کی ہدایت کی گئی ہے۔
ادھر بلوچستان کے ژوب، شیرانی، بارکھان، سبی، کوہلو، ہرنائی، نصیر آباد اور ڈیرہ بگٹی جبکہ سندھ کے لاڑکانہ، سکھر، جیکب آباد، دادو، کشمور، گھوٹکی، شکارپور، خیرپور، شہید بینظیر آباد اور نوشہرو فیروز میں بھی مختلف اوقات میں بارشوں کی پیشگوئی کی گئی ہے۔
این ڈی ایم اے نے شہریوں کو مشورہ دیا ہے کہ شدید بارش کے دوران نشیبی علاقوں، برساتی نالوں اور انڈر پاسز کے قریب غیر ضروری آمدورفت سے گریز کریں۔ سیاحوں، مسافروں اور مقامی انتظامیہ کو بھی موسمی صورتحال پر نظر رکھنے اور متعلقہ اداروں کی ہدایات پر عمل کرنے کی تلقین کی گئی ہے۔
اتھارٹی نے عوام سے کہا ہے کہ بروقت موسمی معلومات اور حفاظتی ہدایات کے لیے پاک این ڈی ایم اے ڈیزاسٹر الرٹ ایپ سے استفادہ کریں، جبکہ تمام صوبائی اور ضلعی اداروں کو بھی ممکنہ ہنگامی صورتحال سے نمٹنے کے لیے الرٹ رہنے کی ہدایت جاری کی گئی ہے۔